స్వస్తిక్ న్యూస్,హైదరాబాద్ :- ప్రధానమంత్రి కిసాన్ సమ్మాన్ నిధి (PM-Kisan) పథకం కింద రైతులకు అందించే రూ. 2,000 పెట్టుబడి సాయం ఇవాళ రైతుల ఖాతాల్లో జమ కానుంది. అయితే, ఈ పథకం ద్వారా లబ్ధి పొందాలంటే రైతులు ఒక ముఖ్యమైన పనిని తప్పనిసరిగా పూర్తి చేయాల్సి ఉంది. అదే ఈ-కేవైసీ (eKYC). ఇప్పటివరకు ఈ-కేవైసీ ప్రక్రియను పూర్తి చేయని రైతుల ఖాతాల్లో ఈ విడత డబ్బులు జమ కావని అధికారులు స్పష్టం చేశారు.ఇప్పటికీ కేవైసీ చేసుకోని రైతులు ఆందోళన చెందాల్సిన అవసరం లేదు. వారు ఆన్లైన్ లేదా ఆఫ్లైన్ విధానాల ద్వారా వెంటనే తమ ఈ-కేవైసీని పూర్తి చేసుకుని నిధులను పొందవచ్చు.
ఆన్లైన్లో ఈ-కేవైసీ ఎలా చేసుకోవాలి..?స్మార్ట్ఫోన్ లేదా కంప్యూటర్ ఉన్న రైతులు పీఎం కిసాన్ అధికారిక వెబ్సైట్ ద్వారా కొన్ని నిమిషాల్లోనే కేవైసీని పూర్తి చేసుకోవచ్చు.ముందుగా పీఎం కిసాన్ అధికారిక వెబ్సైట్ pmkisan.gov.in లోకి లాగిన్ కావాలి. హోమ్పేజీలో కనిపించే 'e-KYC' ఆప్షన్పై క్లిక్ చేయాలి.అక్కడ అడిగిన విధంగా మీ ఆధార్ నంబర్ను నమోదు చేయాలి.అనంతరం మీ ఆధార్ కార్డుకు అనుసంధానమైన (రిజిస్టర్డ్) మొబైల్ నంబర్కు ఒక ఓటీపీ (OTP) వస్తుంది.ఆ ఓటీపీని వెబ్సైట్లో నమోదు చేసి 'సబ్మిట్' బటన్ నొక్కితే.. మీ ఈ-కేవైసీ ప్రక్రియ విజయవంతంగా పూర్తవుతుంది.మీసేవా లేదా CSC కేంద్రాల ద్వారా..స్మార్ట్ఫోన్ లేదా ఇంటర్నెట్ సదుపాయం లేని రైతులు తమ సమీపంలోని మీసేవా లేదా కామన్ సర్వీస్ సెంటర్ల (CSC) ను సందర్శించవచ్చు. అక్కడ సిబ్బంది బయోమెట్రిక్ (వేలిముద్రల) విధానం ద్వారా కేవైసీని సులభంగా పూర్తి చేస్తారు. రైతులు వెంటనే స్పందించి ఈ-కేవైసీ ప్రక్రియను పూర్తి చేయడం ద్వారా ఎటువంటి ఆటంకం లేకుండా పీఎం కిసాన్ నిధులను తమ ఖాతాల్లో జమ చేసుకునే అవకాశం ఉందని అధికారులు సూచిస్తున్నారు.
